NEMC yaupiga ‘stop’ uwanja Yanga

Uwanja wa Yanga ukiwa umejaa maji jijini Dar es Salaam. Picha na Maktaba 

Dar es Salaam. Ndoto ya Yanga ya kutaka kuongezewa eneo la kujenga uwanja wake Jangwani imegonga mwamba baada ya  Baraza la Mazingira la Taifa (NEMC) kudai eneo ni hatarishi.

Habari za uhakika ilizozipata gazeti hili kutoka kwa moja wa viongozi kutoka NEMC zinasema kuwa katika mapendekezo yao kwa Kamati ya Mazingira Manispaa ya Ilala wamependekeza Yanga wasipewe eneo hilo kwa vile ni hatarishi na ni mkondo wa upumuaji wa bahari ikiwa ni pamoja na mto mkubwa wa Msimbazi.

“Manispaa haina tatizo inasubiri tu tamko la NEMC kimaandishi pamoja na Waziri wa Ardhi Nyumba na Makazi, kama Yanga wapewe kibali au la, lakini NEMC walishasema wazi Yanga wasipewe kibali kwa vile eneo lile ni hatarishi pia lina matatizo makubwa.

“Kuacha  Bonde la Mto Msimbazi, pamoja na mkondo wa upumuaji wa bahari, kuna mabomba pale lile linalopeleka maji Hospitali ya Muhimbili na lingine linalopeleka maji baharini, haiwezekani kwa Yanga kuongezewa eneo kwanza hapo walipo wanatakiwa waondoke lile ni eneo hatarishi.

“Kuna kituo cha mabasi yaendayo kasi kipo pale kile sio cha muda ni cha kudumu, sijui ni nani aliyewambia kile ni kituo cha muda, kuna mlolongo mrefu sana, na Yanga wameshambiwa wakubaliane na ushauri wa Serikali watafute eneo jingine kwa ajili ya ujenzi wa uwanja wao, kwa pale haiwezekani,” alisema kigogo huyo.

Akizungumzia suala hilo Mwenyekiti wa Kamati ya ujenzi wa uwanja huo wa Yanga, Francis Kifukwe alionyesha kushangazwa na kudai kuwa hana taarifa zozote.

“Huyo mtu anayesema tumenyimwa eneo ni muongo, barua ya NEMC ambayo walituandikia mwaka jana mbona hawajatuambia hivyo, kuna masharti ambayo wametupa wakasema tukitekeleza kila kitu kitaenda sawa.” alisema Kifukwe ambaye hata hivyo hakutaka kuweka wazi masharti hayo waliyopewa.

Kamati ya Mipango Miji na Mazingira ya Manispaa ya Ilala ilikutana hivi karibuni kujadili suala hilo ambalo hata hivyo wameliacha suala hilo mikononi mwa NEMC.

Kamati ya Mipango Miji na Mazingira ya Manispaa ya Ilala ilifanya  ziara ya ukaguzi Jangwani hivi karibuni kuangalia eneo linaloombwa na klabu ya Yanga kwa ajili ya ujenzi wa uwanja wake wa kisasa.CHANZO MWANAINCHI