ROSE MUHANDO: KUTOKA OMBAOMBA HADI NYOTA WA MUZIKI WA INJILI KIMATAIFA

Maisha uliyoishi zamani hayawezi kukukwamisha kufikia malengo uliyojiwekea. Hakuna mtu ambaye alifikiri leo hii  Muhando angeweza kuwa mwanamuziki mkubwa wa nyimbo za Injili anayelipwa fedha nyingi kutokana na muziki wake, hasa kwa wale waliomjua tangu utoto wake. (HM)

Lakini mwanamuziki huyo aliyesaini mkataba wa miaka mitano na Kampuni ya Sony Music Africa ya Afrika Kusini alioanza kuutumikia mwaka huu 2014, anasema kuwa maisha yake yalianzia katika hali duni kwani alikuwa akiombaomba baada ya kufukuzwa katika familia yake huko Dumila mkoani Morogoro kwa kosa la kubadili dini.

"Nilikuwa mwimbaji mzuri sana wa kaswida, nilihudhuria kila siku madrasa nikiwa Dumila. Baadaye maisha yangu yalikuwa magumu sana, chanzo cha haya yote ilikuwa ni ugonjwa uliosababisha afya yangu kudhoofu. Kwa wakati huo nilipimwa kila ugonjwa sikukutwa na tatizo, ndipo siku nilipoamua kwenda katika maombi," anasema Rose Muhando ambaye sasa anatamba na wimbo Wololo alioutoa chini ya Sony Music Africa.

Anasimulia kuwa baada ya maombi hayo, alipona na hapo ndipo alipoamua rasmi kubadili dini akiwa na umri wa miaka 12.

"Nilipobadili dini, wazazi wangu walichukizwa na uamuzi wangu, waliona ni busara kunifukuza nyumbani, kumbe walizidi kunihatarishia maisha yangu. Niliendelea kutangatanga na baadaye nilipata waume, ambao walinizalisha watoto watatu," anasimulia na kuongeza:

"Nikiwa na mtoto wa miezi sita niliwahi kufukuzwa na mchungaji mmoja jijini Arusha kwa kuwa tu nilikwenda kumwomba msaada wa fedha kidogo za kurekodi studio. Kitu hicho kiliniuma sana na sitakisahau katika maisha yangu. Kila nikikaa hukumbuka na kuumia sana."

Anasema kwamba alifika Arusha kwa ajili ya kurekodi wimbo wake wa kwanza, ambapo kutokana na kutokuwa na fedha aliona ni busara kumwomba msaada mchungaji huyo, lakini ilishindikana.

"Alinifukuza nikiwa na mtoto mchanga aliyekuwa na mgonjwa wa pumu, niliumia sana na hapo ndipo nilipomwambia Mungu nikasema yeye anajua ameniandalia nini kwenye maisha yangu," anaeleza Rose.

Anasimulia kuwa alianza safari ya kurejea nyumbani, lakini kwa bahati nzuri njiani alikutana na watu wenye asili ya Somalia na kujitambulisha kwao kuwa aliwahi kuwa muumini wa dini ya Kiislamu, nao walimsaidia na kumsafirisha hadi mkoani Morogoro.

Baada ya kufika Morogoro aliendelea na maisha na baadaye kujiunga na kwaya moja mjini Dodoma, wakati huo alikuwa tayari na watoto watatu akiwa pia ameshaokoka.

"Nilianza muziki katika kwaya iliyopo Dodoma, baadaye nikawa mwalimu wa kwaya hiyo ya Dodoma St. Mary's katika Kanisa la Kianglikana la Chimuli. Niliendelea hivyo mpaka nilipoamua kuanza kutunga nyimbo zangu mwenyewe kwa msaada wa mfuko wa kwaya yetu," anabainisha na kuongeza:

"Januari mwaka 2005, ndipo nilipoanza kuona uwepo wa Mungu, nilipokea tuzo mbalimbali ikiwamo ya MtunziBora wa nyimbo za Injili, Mwimbaji Bora na Albamu Bora ya Mwaka, zilizotolewa na Tanzania Gospel Music Awards 2004."

Anafafanua kuwa aliendelea kufanya vizuri katika medani ya muziki wa nyimbo za Injili ambapo Desemba 2005 alihudhuria na kuimba katika tamasha la nyimbo za Injili katika kusaidia kuwachangia watoto na wajane jijini Dar es Salaam.

"Nashukuru Mungu mpaka nilipofika sasa nina albamu nne, sanjari na tuzo sita, tatu kutoka albamu ya Mteule Uwe Macho nilizopata mwaka 2005, Tuzo ya Mwimbaji Bora wa nyimbo za Injili mwaka 2009 na Tuzo ya Tanzania Broadcasting Corporation ( TBC), kupitia wimbo wangu Nibebe, huku mwaka 2008 nikipata tuzo kutoka Kenya Groove Awards kama Mwimbaji Bora wa nyimbo za Injili Afrika," Rose anajinasibu.

Albam nne za Rose Muhando ni pamoja na; Mteule Uwe

Macho (2004), Kitimutimu (2005), Jipange Sawa Sawa (2008) na Yesu Kung'uta albamu iliyotengenezwa chini ya Sony mwaka huu 2014.

Anaweka wazi kuwa Februari 2011, ndipo alisaini mkataba na Kampuni ya Sony uliojulikana kama (Multi Album Recording Deal with Sony Music) na kuwa msanii wa kwanza kusaini mkataba huo kutoka ukanda wa Afrika Mashariki.

Maisha yake chini ya Sony Music Africa

Rose anatanabaisha kwamba licha ya kusaini mkataba huo mwaka 2011, lakini Januari mwaka huu ndipo alipoanza kuutumikia na utadumu kwa miaka mitano hadi mwaka 2018.

"Nilisaini mkataba miaka miwili iliyopita, lakini wakati huo nilikuwa bado ninamalizia baadhi ya mikataba mingine, hivyo tumeanza rasmi mwaka huu. Nashukuru Mungu kwani ni mkataba mnono wenye kila aina ya neema. Nagharimiwa kila kitu, kazi yangu mimi ni kuimba tu, hicho ndicho natakiwa kukiwasilisha kwa Sony Music Africa," Rose anaweka wazi.

Anadokeza kwamba kuna tofauti kubwa kati ya mkataba huo na ile ya nje ya nchi kama wa Sony.

"Mimi Rose Muhando sina vitu vinavyonisonga, kila kitu nafanyiwa na Sony, kuanzia mavazi, chakula, malazi, yaani kila kitu. Lakini mikataba ya hapa nchini ni tofauti kwani meneja ndiyo anakuwa bosi wako, sasa mimi ni bosi wa Sony Music Africa," anasema.

Anafafanua kwamba kwa mkataba huo mpya sasa wanaotaka kumwalika katika matamasha na mialiko mingine nje na ndani ya nchi, wanapaswa kuwasiliana na Sony, lakini mialiko ya mikutano ya Injili, hiyo kwake ni ibada.

"Mikutano ya Injili yote kwangu ni ibada hii haipo chini ya Sony, naweza kufika na kuhudhuria wakati wowote. Lakini inategemea ni mahala gani kwani mapatano ni kitu cha msingi," Rose anaweka wazi.

Albamu ya Yesu Kung'uta (Wololo)

Akizungumzia albamu yake mpya aliyoiandaa chini ya Kampuni ya Sony Rose anabainisha: "Katika albamu ya Wololo iliyotengenezwa chini ya Sony kuna kazi nimefanya nikiwa Afrika Kusini, lakini nyingi nimefanyia hapa Tanzania baada ya wao (Sony) kuridhia kwamba studio hizo zina ubora wa kutosha, nimekuwa nikisafiri kwenda Afrika Kusini na kurudi mara kwa mara."

Muhando anasema kuwa albamu hiyo ina jumla ya nyimbo nane akitaja baadhi kuwa ni wimbo Yesu Kung'uta maarufu kwa jina la Wololo uliobeba jina la albamu na Uko Juu Sana.

"Mpaka sasa nimeshaachia nyimbo hizo mbili; Uko Juu Sana na Wololo, neno lililotumika kama kibwagizo katika wimbo wa Yesu Kung'uta. Video ya wimbo huu ilitengenezewa Afrika Kusini na wote walioshiriki katika video hiyo ni kutoka Afrika Kusini," anasema.

Nyota huyo wa muziki wa Injili aliamua kutoa ya moyoni mwake kuhusu hali ya sintofahamu miongoni mwa wasanii nchini, akisema inachafua tasnia ya sanaa Tanzania kwenye anga za kimataifa. "Nachukizwa sana na baadhi ya wasanii wa muziki wa kizazi kipya, Injili, waigizaji na mastaa wengine kutumia mwanya wa sanaa, kufanya mambo mengine yasiyo haki mbele za Mungu. Kwa nini usiishi maisha yako? Kwa nini uwe na tamaa ya kufanikiwa haraka bila jasho? Inaniumiza, ninapowaona wasanii wanakamatwa na dawa za kulevya nje ya nchi," anasema na kuongeza:

"Tunadhalilishwa sana, imefika hatua hatuaminiki tena. Ni lazima sasa tutambue kwamba anasa siyo maisha yanayofaa, wengi wetu tukishapata umaarufu tu tunajisahau,. Sasa wewe unavyobeba dawa za kulevya na kuingiza nchini, si unaua taifa la kesho?"

Anasema kuwa kinachomuumiza zaidi ni kwamba wanaoshiriki katika masuala hayo ni wanawake, akionya : "Biblia inasema 'usinie (usitake) makubwa kupita uwezo wako." Chanzo: mwananchi