Facebook bandia yaitia Marekani matatani

 Mwanamke mmoja ameishtaki serikali ya Marekani baada ya kubuni mtandao bandia wa facebook ulio na picha zake ikiwemo picha moja ambayo ilimuonyesha akiwa nusu uchi.

Idara ya haki imekiri kwamba mmoja wa maajenti wake alibuni ukurasa huo wa mtandao wa facebook bila kumuelezea Sondra Arquiett.

Hapo awali idara hiyo ilisema kuwa bi Arquiett alikubali hatua hiyo kwa kuwa aliwaruhusu maafisa wake kuingia katika simu yake ya mkononi.

Idara hiyo ya haki sasa inachunguza iwapo ukurasa huo ni ukiukaji wa haki za mwanamke huyo.

Kesi hiyo inatarajiwa kusikilizwa wiki ijayo mjini New York ,huku serikali ya Marekani na ajenti huyo wa kitengo cha kukabiliana na dawa za kulevya Timothy Sinnigen wakitajwa kuwa washtakiwa.

Kesi hiyo ilianza miaka minne iliopita lakini 


ikaripotiwa na mtandoa wa habari wa Buzzfeed.

Mtandao huo bandia ulibuniwa baada ya muhudumu huyo wa mgahawa bi Arquiett kukamatwa mnamo mwezi Julai 2010,na kushtumiwa kwa kuhusika katika genge moja la dawa za kulevya.

Alikiri njama ya kumiliki dawa ya Cocaine kwa lengo la kuisambaza na alihukumiwa miezi sita ya kifungo cha wikendi.

Wakati alipokamatwa ,bi Arquiett alisalimu simu yake ya mkononi na kuwaruhusu maafisa kuchunguza data yake ili kuwasaidia na uchunguzi wa uhalifu kama huo.

Uchunguzi huo ulimshirikisha mpenziwe,Jermaine Branford ambaye alishukiwa kwa kuratibu uuzaji wa dawa za kulevya.Baadaye alikiri kuwa katika njama ya kuuza dawa hizo za kulevya.

Bi Arquiett hatahivyo alisema kuwa hakuelezwa iwapo oparesheni hiyo ingebuni ukurasa bandia wa facebook kupitia jina la Sondra Prince ambalo amekuwa akiitwa na marafikize.

Ukurasa huo ulishirikisha picha za mwanamke huyo pamoja na zile za mwanawe na mpwa wake.

Kulingana na wakili wake picha moja ilimuonyesha mwanamke huyo akiwa nusu uchi.

Bi Arquiett amesema kuwa hatua hiyo inakiuka haki zake za faragha na sasa anataka kulipwa fidia ya dola 250,000.