Mbowe kujitetea kesi ya shambulio Ijumaa.

Mwenyekiti wa Chama cha Demokrasia na Maendeleo (Chadema), Freeman Mbowe.

Mahakama ya Hakimu Mkazi Wilaya ya Hai, Mkoani Kilimanjaro, imepanga kuanza kusikiliza utetezi wa Mwenyekiti wa Chama cha Demokrasia na Maendeleo (Chadema), Freeman Mbowe (pichani), Februari 27, Ijumaa, baada ya kiongozi huyo kushindwa kufika mahakamani hapo jana kujitetea kama ilivyokuwa imepangwa.

 

Mbowe anakabiliwa na kesi ya  kumshambulia mwangalizi wa ndani wa uchaguzi mkuu wa mwaka 2010, Nasir Yamin, Jimbo la Hai. 

Mwenyekiti huyo wa Chadema alitakiwa kujitetea mahakamani hapo jana, lakini alishindwa kufanya hivyo, kutokana na kuhudhuria uzinduzi wa uandikishaji wapiga kura katika Daftari la Kudumu la Wapiga Kura kwa njia ya mfumo wa mashine za kielekroniki (BVR).

Akitoa sababu za Mbowe kutofika mahakamani hapo jana mbele ya Hakimu Mkazi Mfawidhi wa mahakama hiyo, Denis Mpelembwa, wakili Issa Rajab, alisema mteja wake huyo hakuweza kufika mahakamani kwa ajili ya kujitetea kwa sababu kwa nafasi yake amealikwa kuhudhuria uzinduzi huo.

“Kwa hiyo mheshimiwa hakimu tunaomba tarehe nyingine ambayo mteja wetu atatakiwa kufikia kwa ajili ya kujitetea,” alisema wakili huyo.

Aidha, Wakili Rajab alidai kuwa shahidi muhimu wa Mbowe, Clement Kwayu, ambaye ni Mwenyekiti wa Halmashauri ya Wilaya ya Hai, naye  hakuweza kufika mahakamani hapo kutokana na dharura ambayo hata hivyo hakuieleza mahakama hapo. Baada ya ombi hilo la upande wa utetezi, Hakimu Mpelembwa, alimtaka mdhamini wa Mbowe, Awazi Uronu kuhakikisha mshtakiwa anafika mahakamani hapo tarehe iliyopangwa bila kukosa, kwa kuwa kesi hiyo imechukua muda mrefu kumalizika huku kila upande ukitaka haki itendeke.

Katika kesi hiyo, Mbowe anadaiwa kumshambulia kwa kipigo mwangalizi huyo, Nassir Yamin, katika kijiji cha Nshara, kata ya Machame Kusini, wilaya ya Hai, mkoani Kilimanjaro mwaka 2010.