Watatu wauawa, 6 wajeruhiwa mapigano wakulima, wafugaji.

Kamanda wa Polisi Mkoa wa Morogoro, Leonald Paulo.

Watu watatu wameuawa na wengine sita kujeruhiwa katika mapigano yaliyozuka kati ya wakulima na wafugaji katika Bonde la Kilimo cha Mpunga la Matembele, lililoko kati ya vijiji vya Mabwegere na Mbigili, Wilaya ya Kilosa, mkoani Morogoro.

Waliofariki; wawili wanatoka upande wa wakulima, ambao ni wakazi wa Kijiji cha Mbigili na mmoja ni mfugaji kutoka jamii ya Kimasai anayeishi katika Kijiji cha Mabwegere.

Kati ya waliojeruhiwa; wawili hali zao zinadaiwa kuwa ni mbaya na hivyo, kulazimika kuhamishiwa katika Hospitali ya Rufaa ya Morogoro kwa matibabu zaidi.

 Mapigano hayo yalizuka juzi zikiwa zimepita wiki mbili baada ya nyumba 46 zilizokuwa zikimilikiwa na baadhi ya wafugaji wa Kijiji cha Mabwegere na wakulima kuchomwa moto na kundi linalodaiwa ni la wakulima, huku wafugaji wa jamii ya Kimasai wakikimbia kuokoa maisha yao.

 Akizungumza na waandishi wa habari baada kuwatembelea majeruhi waliopo katika Hospitali ya Misheni ya Mtakatifu Joseph, iliyopo katika mji mdogo wa Dumila, Mkuu wa Wilaya ya Kilosa, Elias Tarimo, alithibitisha kutokea kwa vifo hivyo pamoja na majeruhi.

Aliwataja waliofariki kuwa ni Joseph Peter (26) na Rajab Nasoro (55) wote wakulima kutoka Kijiji cha Mbigili na mfugaji wa jamii ya Kimasai, Kaduhu Kashu, ambaye ni mkazi wa Kijiji cha Mabwegele. Wote walifariki baada kuchomwa vitu vyenye ncha kali katika mapigano hayo.

 Waliojeruhiwa ni Binzi Dotto (42) Shigele John, Juma Someke, Mohamed Athuman, Mbwana Athuman na mfugaji, ambaye jina lake halijatambulika baada ya kukimbizwa na ndugu zake katika hospitali isiyofahamika.

Alisema tukio hilo lilitokea juzi, majira ya kati ya saa 9 na saa 10 jioni, baada ya wakulima  wanaokadiriwa kufikia 15 kutoka katika Kijiji cha Mbigili, kwenda katika Bonde la Matembele wakiwa na matrekta kwa ajili ya kuanza kutayarisha mashamba ya kilimo cha mpunga. Tarimo alisema siku mbili kabla ya tukio hilo, aliitisha kikao cha maridhiano baina ya pande mbili hizo kwa ajili ya kupata suluhisho la mgogoro wa bonde hilo, lakini upande wa viongozi wa kijiji cha wafugaji cha Mabwegere haukufika katika mkutano huo.

 Aliitupia lawama Wizara ya Ardhi, Nyumba na Maendeleo ya Makazi kwa kushindwa kupeleka wasuluhishi wa mgogoro huo wa ardhi katika bonde hilo kama walivyoahidi.

 Muuguzi wa zamu katika hospitali hiyo, Milenia Shayo, alithibitisha kupokea miili ya watu wawili na mmoja kufariki wakati akiendelea kupatiwa matibabu.

Kamanda wa Polisi Mkoa wa Morogoro, Leonald Paulo, alisema kupitia Afisa Habari wake, Nabwike Mwakatika, kuwa atatoa taarifa baada ya kutoka kwenye eneo la tukio.