Ngassa arudi Yanga kwa nguvu

Na Waandishi Wetu
WAKATI ikidaiwa kuwa majaliwa ya kiungo mshambuliaji Mrisho Ngassa kuwa shakani kwenye klabu yake ya Azam, hali ya mambo sasa inaonyesha ni kama filamu, kwani Ngassa ametamka wazi kuwa anaipenda klabu yake ya zamani ya Yanga ambayo imekuwa ikihusishwa kumsajili.

Ngassa ambaye aliifungia Azam bao la ushindi timu yake katika mechi ya nusu fainali Kombe la Kagame dhidi ya Vita Club ya DR Congo, jana kwenye Uwanja wa Taifa, aliwafuata mashabiki wa Yanga na kushangilia pamoja nao kisha baada ya mechi akarejea tena jukwaani hapo na kupewa jezi ya Yanga kisha kuivaa.