MADAKTARI WALIOGOMA WATAKA KUMUOMBA RADHI RAIS JAKAYA KIKWETE ANA KWA ANA

Mwenyekiti wa Jumuiya ya Madaktari walioathirika na mgomo Dr. Paul Swakala (katikati) akizungumza na waandishi wa habari jijini Dar es Salaam.

…………………………………………………….

MADAKTARI wanaofanyakazi chini ya usimamizi wa madaktari bingwa  (Interns), hatimaye wamejitokeza na kuwaomba radhi wananchi pamoja na serikali kutokana na kitendo chao cha kufanya mgomo ambao umesababisha madhara kwa baadhi ya wananchi. 

Wakizungumza na wandishi wa habari katika Ukumbi wa Idara ya Habari (Maelezo), Kiongozi wa Madaktari hao, Dk Paul Swakala, alisema  mtakumbuka  kuwa  Juni mwaka huu ulitokea mgomo wa madaktari ukiwa ni mwendelezo wa mgomo uliyoanza Desemba 2011.

Alisema wanawaomba radhi Wananchi wenzao na serikali kutokana na madhara yote yaliyosababishwa na migomo ile  ambayo ushiriki wao ulikuwa hauepukiki.

Dk Swakala alisema kuwa wapo walioathirika na mgomo ule, wanaomba radhi pamoja na usumbufu huo ambapo wanakiri pia kuwa wananchi wengi walichukizwa na migomo hiyo.

“Ingawa utamaduni wa kuomba radhi hadharani katika nchi yetu haujazoeleka lakini tumeamua kufanya hivyo kwa sababu sisi ni binadamu na binadamu wote tunamapungufu.

“Pia tunamuomba radhi Rais Jakaya Kikwete na serikali yake kwa usumbufu uliosababishwa na mgomo ule ambapo tunatambua jitihada zake za kutafuta suluhu ya mgomo ule”alisema.endelea kupitia audiface jackson blogspot kwa habari zaidi..Vilevile wanatambua na kuunga mkono juhudi zake katika kuboresha huduma za afya nchini na changamoto nyingi ambazo zinaikabili  sekta hiyo nchini.

Hata hivyo, alisema wanazidi  kumuomba aiangalie zaidi sekta hiyo kwani maisha ya Watanzania wengi wanategemea huduma bora za sekta hiyo.

Alisema wanawahakikishia watanzania kuwa hawako tayari tena kushiriki kwa namna yeyote katika migomo inayoweka rehani maisha ya wananchi.

“Kwa hakika, tunajutia sana kosa hili na tuko tayari kurejea kazini kuendelea kuwahudumia watanzania wenzetu kwa moyo mweupe”alisema

Kama hiyo haitoshi, wanayo dhamira ya kweli ya kuomba kuonana na  Rais ili waweze kuomba radhi kwake ana kwa ana.