CHADEMA YALIPUKA, YATAJA MAJINA 10 YA VINARA WA UGAIDI. WAMO USALAMA WA TAIFA, KIGOGO WA SERIKALI. YAELEZA KIBANDA, DK ULIMBOKA WALIVYOTEKWA.

Mjumbe wa Kamati Kuu ya Chadema, Mabele Marando akizungumza na waandishi wa habari Makao Makuu ya chama hicho jijini Dar es Salaam leo juu ya matukio makubwa yaliyotokea nchini Tanzania yakiwemo yale ya kuchomwa kwa makanisa, maandamano ya wafuasi wa dini ya Kiislamu pamoja na tukio la kutoweka kwa Sheikh Farid wa Zanzibar ambaye kwa sasa amepatikana akiwa hai.

CHAMA cha Demokrasia na Maendeleo (CHADEMA) kimeibua siri nzito ya mtandao wa mawasiliano ya watu 10 wakiwamo vigogo wa Serikali, wanaodaiwa kupanga njama za vitendo vya ugaidi, kuteka watu, kujeruhi, kuua na kuchafua chama hicho. 

Kutokana na kupatikana mtandao huo, chama hicho kimesema kitawasilisha ombi maalum la kuomba amri ya mahakama, kuziagiza kampuni za simu za mkononi kuvipatia vyombo vya sheria taarifa za watu hao ili haki itendeke pamoja na jamii ijue ukweli wa mambo hayo.

Akizungumza na waandishi wa habari mjini Dar es Salaam jana, mwanasheria mwandamizi wa chama hicho, Mabere Marando alisema haikuwa kazi nyepesi kupata mawasiliano na nyaraka za watu hao, ambazo zina ushahidi wa kutosha, huku nyingine zikionyesha vikao vilivyokuwa vikifanyika katika hoteli mbalimbali mjini Dar es Salaam.

Bila kificho, Marando alitaja majina 10 ya vigogo hao na namba zao (MTANZANIA tunazo) jinsi walivyokuwa wakiwasiliana kwa nyakati tofauti na kutumiana fedha, huku wengine wakikutana katika Hoteli ya Sea Cliff na Tamal.

Vigogo hao, ni kutoka Idara ya Usalama wa Taifa (TISS), Baraza la Mawaziri, Chama Cha Mapinduzi (CCM), waliokuwa wanachama wa Chadema na waandishi wa habari.

Ukiwaacha vigogo watano wa Idara ya Usalama wa Taifa na mawaziri, Marando alimtaja Naibu Katibu Mkuu wa CCM, Mwigulu Nchemba ambaye alionekana kutumia simu tano tofauti za kiganjani, kuwasiliana na idara hiyo kwa nyakati tofauti pamoja na mtoto wa kiongozi mkubwa nchini.

Mbali ya vigogo hao, Marando alimtaja mmoja wa wafanyakazi wa Chadema, Saumu Malungu aliyefukuzwa hivi karibuni baada ya kudaiwa alikuwa akifanya mawasiliano ya mara kwa mara na Nchemba na maofisa wa Idara ya Usalama wa Taifa.

“Kwa kauli moja, chama kiliamua kumfukuza Malungu kutokana na kuwa na mawasiliano na Nchemba na maofisa wa Idara ya Usalama wa Taifa, ambao walikuwa wanampa kazi ya kuwarubuni vijana wa Chadema ili kutoa ushahidi wa uongo juu ya video vya Lwakatare,” alisema Marando.

Alisema namba za simu za Nchemba, zimebainika kuwasiliana na Ludovick Rwezahula, ambaye ni mtuhumiwa namba mbili wa kesi ya ugaidi.

Alisema namba hiyo, pia imeonekana wazi kuwa ilihusika kupanga mipango ya kumteka aliyekuwa Rais wa Chama cha Madaktari Tanzania (MAT), Dk. Steven Ulimboka.

“Lakini si hilo tu, tumebaini Mhariri Mtendaji wa Gazeti la Mwananchi, Dennis Msaky anayedai kutaka kutekwa na Lwakatare, ameonekana kuwa na mawasiliano ya mara kadhaa na Ludovick hadi kukutana pamoja, Desemba mwaka jana katika Hoteli ya Tamal iliyopo Mwenge na kufanya mazungumzo, ambapo alipigwa picha wakinywa vinywaji.

Alisema Machi 29, mwaka huu, Ofisa wa Usalama wa Taifa (jina tunalo), alimrubuni Ofisa wa Usalama wa Chadema, Ahmed Sabula akimtaka wakutane na wenzake katika hoteli ya Sea Cliff ambapo walifanya mkutano.

Katika mkutano huo, walimshawishi Sabula kukubali kutumika kutoa taarifa za Chadema makao makuu na mipango ya viongozi wa kitaifa na kumhakikishia wangemlipa kitita cha Sh milioni 30 ndani ya wiki mbili.

Alisema katika mazungumzo hayo, maofisa hao walimwahidi kumlipa tena Sabula Sh 500,000 kila mwezi ikiwa ni malipo ya kupeleka nyaraka za Chadema.

“Katika makubaliano hayo, maofisa usalama walimtaka Sabula awe mpole na mvumilivu kwani atapotea kwa miezi mitano au sita kabla ya kurudi kwenye majukumu yake ndani ya Chadema.

“Uchunguzi huu, tumeufanya kabla ya kukamatwa kwa Mkurungezi wetu wa Ulinzi na Usalama, Wilifred Lwakatare ambaye hivi sasa anashitakiwa kwa tuhuma za ugaidi….tumebaini kuwapo genge la watu kutoka ndani ya Serikali ya CCM, familia ya kiongozi mkubwa wa nchi hii na chama hicho.

“Tumefanya hivyo kwa kuangalia maslahi mapana ya taifa na chama hivi sasa, tunazo nyaraka nyingi za mawasiliano na nyingine za picha kama mnavyoziona hapa zikionyesha mambo yote yalivyokuwa yakipangwa. 

“Mipango yao yote ilikuwa ya kishetani, huku wakilenga kukisingizia Chadema, watu hao kwa nyakati tofauti wameonekana kuanza mpango huo tangu mwaka jana.

“Wamo walioshiriki tukio la kutekwa Dk. Ulimboka na Mhariri Mtendaji Mkuu wa Kampuni ya New Habari (2006), Absalom Kibanda,” alisema.

“Cha ajabu kila walipokuwa wakiwasiliana na watu hao kwa nyakati tofauti, lazima tukio linatokea, ukiangalia tukio la Kibanda utabaini siku moja kabla kumekuwapo na mawasiliano ya watu hao, hivyo hivyo na kwa Dk. Ulimboka.

“Tumebaini fedha ya kurekodi video ya Lwakatare ilitoka Ikulu, Chadema tunashukuru ushirikiano tulioupata kutoka kwa watu wa usalama, ndio maana tunasema ndani ya CCM tupo, jeshini tupo, polisi tupo kitendo cha kusema chama kitakufa wasahau hilo, Watanzania bado wana imani kubwa.

“Kesi ya Lwakatare, imetufungua macho na kugundua mkakati mbaya wa Serikali, ndiyo maana chama kimekaa na kuona uzito wa mkakati huu na kuniteua kesho (leo), kuongoza jopo la mawakili wenzangu Profesa Abdallah Safari, Tundu Lissu, Edson Mbogoro, Peter Kibatala na Nyaronyo Kichere kwa ajili ya kumtetea Lwakatare.

“Nyaraka tulizonazo, zinaonyesha jinsi vigogo wa idara ya usalama wa taifa ilivyokuwa ikiwasiliana na viongozi wa CCM, hizi taarifa tutaziwasilisha mbele ya mahakama na tunafurahi kesi kupelekwa huko.

“Hata polisi au Usalama wa Taifa, wakifika sasa wakizitaka nitawapa kwani zimeandaliwa nyingi za kutosha tunachoomba mahakama itende haki ili ukweli ujulikane kwa Watanzania.

“Bahati nzuri chama kimejipanga kukabiliana na mikakati michafu ya CCM, kimeamua kuunda kanda maalum, Profesa Safari amepewa uenyekiti wa Kanda ya Pwani, mimi msaidizi wake na Halima Mdee ni katibu, lengo ni kuhakikisha 2015 majimbo ya Dar es Salaam na Pwani yanachukuliwa na Chadema, tunataka tuwaonyeshe hatushindwi,” alisema.

Alisema kuwa wakati wanafuatilia kupata mawasiliano katika kampuni za simu za mikononi, wamepewa taarifa za watumishi wa Kampuni ya Vodacom, kuwa Nchemba amekuwa akiwaomba kumfutia taarifa zake zote za awali katika namba zake anazotumia (MTANZANIA tunazo).

“Miongoni mwa mawasiliano ambayo yanahusika na ujambazi huu ni yale ya Desemba 28, siku ambayo mkanda wa Lwakatare ulirekodiwa pia Machi 4 hadi 6, mwaka huu, siku moja kabla Kibanda kutekwa, taarifa hizo zinaonyesha wazi, watusubiri mahakamani.

Marando alisema hakubaliani na kitendo cha Mamlaka ya Mawasiliano Tanzania (TCRA), kupiga marufuku watu kufuatilia mawasiliano ya watu wengine ambapo alisisitiza kuendelea na uchunguzi kwa kuwa ni haki kwa raia yeyote. NA http://www.mtanzania.co.tz