MTENDE YAIKUNG'UTA 3-0 ZIMAMOTO LIGI KUU ZBAR

Na Ally Mohamed, Zanzibar

LIGI Kuu ya Zanzibar, maarufu Zanzibar Grand Malt Premier League imeendelea tena jana na kwenye Uwanja wa Amaan, mjini Unguja, Mtende Rangers, ilichomoza na ushindi wa mabao 3-0 dhidi ya Zimamoto, mabao yake yakitiwa kimiani na Ali Salum dakika ya tano, Ali Manzi dakika ya 42 na Islah Khamis dakika ya 77.

Katika mechi za juzi, Uwanja wa Amaan mjini Unguja, Malindi ambao wameinunua timu ya Miembeni SC, waliteremka uwanjani kuivaa Bandari ambayo imepanda daraja msimu huu, katika mechi hiyo Bandari wameianza vyema ligi hiyo baada ya kuchomoza na ushindi wa mabao 3-2. Mabao ya Bandari yalifungwa na Mussa Omar katika dakika ya 31, Haisam Khamis dakika ya 57 na Shariff Kitwana katika dakika ya 78, wakati mabao ya Malindi yalifungwa na Amour Suleiman dakika ya 44 na 68.

Huko kisiwani Pemba, wawakilishi wa Zanzibar katika michuano ya Kombe la Shirikisho Afrika mwakani, Jamhuri wakicheza na Duma ambayo inamilikiwa na Jeshi la Kujenga Uchumi (JKU) wameanza vizuri baada ya kuchomoza na ushindi wa mabao 2-0, yaliyotiwa kimiani na Mfaume Shaaban katika dakika ya saba na 72.

Ligi hiyo inatarajia kuendelea tena kesho, kwa mchezo mmoja ambao utapigwa Uwanja wa Amaan ukiwakutanisha Mtende Rangers na Zimamoto mechi itakayoanza saa 10:30 jioni.

Mapema Jumamosi, pazia la ligi hiyo lilifunguliwa mechi mbili kuchezwa katika viwanja viwili tofauti, kwenye Uwanja wa Amaan kisiwani Unguja, Mabaharia wa KMKM walikutana na Mafunzo, ambapo mechi hiyo imemalizika kwa Mafunzo kuchomoza na ushindi wa bao 1-0, bao hilo pekee likipatikana katika dakika ya tano, mfungaji Mohammed Abdulrahman.

Huko kisiwani Pemba nako ilipigwa mechi moja ikiwakutanisha mabingwa watetezi wa ligi hiyo, Super Falcon na Chipukizi ambapo kwa mara nyengine tena Super Falcon ambao ni wawakilishi wa Zanzibar katika Ligi ya Mabingwa Afrika mwakani, wamefungwa 2-0.

Hiyo ni mechi ya sita mfululizo Super Falcon wanapokea kipigo, wakianzia katika michuano ya BancABC Super 8, ambapo walipoteza mechi zao zote 3 za hatua ya makundi, kabla ya kukubali kipigo cha 3-1 kutoka kwa Jamhuri katika mechi ya Ngao ya Jamii iliyochezwa Septemba 1, mwaka huu Uwanja wa Amaan na juzi wakicheza na Coastal Union ya jijini Tanga katika mechi ya kirafiki, mchezo uliochezwa Uwanja wa Ngome, Fuoni, Wilaya ya Magharibi, Unguja walifungwa 2-0.

Ligi kuu ya Zanzibar, ambayo msimu huu inafahamika kwa jina la Zanzibar Grand Malt Premier League kutokana na mdhamini kinywaji cha Grand Malt, inashirikisha timu 12, huku timu 8 zikitoka kisiwani Unguja na timu 4 zikitoka kisiwani Pemba, timu zinazotoka kisiwani Unguja ni  Bandari, Chuoni, KMKM, Mafunzo, Malindi, Mundu ambao wamenunua daraja kutoka kwa Miembeni United, Mtende iliyopanda daraja msimu huu na Zimamoto. Kwa upande wa kisiwani Pemba ni Chipukizi, Duma, Jamhuri na Mabinwa watetezi, Super Falcon.  Ligi hiyo inatarajia kuendelea tena leo kwa mechi moja na ya mwisho katika mzunguko wa kwanza, kwenye Uwanja wa Amaan, majira ya saa 10:30 jioni kwa kuzikutanisha timu za Chuoni na Mundu.
source http://bongostaz.blogspot.com/