POLISI ANASWA AKIWANIA UONGOZI NDANI YA CCM MOROGORO.

Mkuu wa jeshi la polisi nchini mh Said Mwema

ASKARI mwenye namba F 7961 PC Stanley Mdoe anayefanya katika kituo cha polisi Mvomero Mkoani hapa anadaiwa kujihusisha na masuala ya siasa na kujikita kwenye kinyang’anyiro cha kugombea ujumbe wa halmashauri kuu ya CCM Taifa kupitia kundi la vijana. 

Habari  zilizopatikana kutoka vyanzo vya habari zimedai kuwa askari huyo anayejitambulisha kuwa yeye ni mtoto wa mkuu wa mkoa wa Morogoro Joel Bendera,akijitambulisha kwa jina la Stanley Bendera alikamatwa mkoani Dodoma majira ya jioni uchaguzi wa umoja wa vija wa chama cha mapinduzi ukiwa unaendelea.

Chanzo hicho kilidai kuwa askari huyo akiwa amevalia sare za chama hicho tangu siku ya kwanza huku akiomba kura kwa wajumbe ya kuchaguliwa kuwa MNEC  akiwa na wapambe wake ambao wengi wao walitokea mkoani  Morogoro.

Ilidaiwa kuwa askari huyo kwa mbwembwe akiwa amepamba gari yake kwa picha zake zilizokuwa zimeandikwa Stanley Joel Bendera,baadahi ya wananchama wa chama hicho wanaomfahamu waliwatonya maafisa usalama waliokuwepo eneo hilo ambapo nao walitoa taarifa kwa jeshi la polisi mkoani Dodoma ndipo alipotiwa mbaroni.

Aidha askari huyo pamoja na juhudi zake za kusaka ujumbe wa NEC lakini hakushinda uchaguzi huo na badala yake kujikuta akiangukia mikononi mwa polisi.

Baadhi ya vyanzo vya habari vilidai kuwa askari huyo tayari aliomba likizo isiyokuwa na malipo na wengine kudai kuwa ameacha kazi,jambo lililosukuma gazeti hili kumtafuta mwajiri wake kuzungumzia suala hilo.

 Hata hivyo gazeti hili baada ya kupata taarifa hizo ilimtafuta mwajiri wake ambaye ni kamanda wa polisi mkoa wa morogoro Faustine Shilogile ambaye alisema kuwa hana taarifa ya askari huyo kujihusisha na masuala ya kisiasa.

Shilogile alisema kuwa  alipata taarifa za kukamatwa kwa askari huyo mkoani humo na kwamba yeye alikuwa akimtafuta kwa shughuli za kikazi kwa muda wa siku mbiuli bila kumpata.

Aidha kamanda huyo alisema hana uhakika kuwa askari huyo mejiingiza katika siasa na kwa sasa ametuma askari wengine kwa ajili ya kwenda kufanya uchunguzi wa suala hilo  na endapo itabainika atachukuliwa hatua za kinidhamu stahiki za jeshi hilo kulingana na taratibu za kijeshi.

“Kusema kwamba aligombea siwezi kulizungumzia kwa kuwa sijadhibisha isipokuwa hakuwepo kazini kwa siku mbili,huu ni utovu wa nidhamu kwa jeshi letu,”alisema shilogile.

Alisema kuhusu sheria,alisema katiba ya nchi sura ya 9 inayohusiana na majeshi ya ulinzi kwa maana ya majeshi yote Tanzania inasema ni marufuku kwa mwanajeshi yeyote kujihusisha na masuala ya siasa na kwamba kama ni kweli amefanya hivyo ni kinyume,kanuni na taratibu za kazi.