KIFO: Brazil yapangiwa Cameroon kombe la Dunia 2014

Wachezaji wa Brazil wakipongezana. Picha na Maktaba 

WENYEJI wa fainali za Kombe la Dunia 2014, Brazil wamepangwa kwenye kundi moja na wawakilishi wa Afrika, Cameroon sambamba na Mexico na Croatia baada ya droo ya upangaji makundi ya michuano hiyo iliyofanyika jana Ijumaa usiku.

Kwenye kundi hilo la A, Brazil anaonekana kama mtemi baada ya kutwaa ubingwa huo mara tano, wakati wapinzani wake hakuna hata mmoja aliyefanikiwa kuwa bingwa.

Mabingwa watetezi, Hispania nao wamepangwa kwenye kundi linalohitaji nguvu ya ziada kupenya baada ya kupangiwa timu za Uholanzi, Chile na Australia kwenye Kundi B.

Staa wa Barcelona, Lionel Messi na Argentina yake amepangwa kwenye Kundi F sambamba na timu za Nigeria, Iran na Bosnia-Herzegovina, wakati mpinzani wake kwenye Ballon d’Or, Cristiano Ronaldo na kikosi chake cha Ureno, anakabiliwa na mtihani mbele ya Ujerumani, Ghana na Marekani kwenye Kundi G.

Kwenye makundi mengine, Uruguay, iliyotinga nusu fainali kwenye fainali zilizofanyika Afrika Kusini miaka minne iliyopita, itamenyana na Italia, Costa Rica na England kwenye Kundi D.

Ivory Coast imepangwa na Colombia kwenye Kundi C, sambamba na timu za Japan na Ugiriki, wakati Ubelgiji itacheza na Algeria, Korea Kusini na Urusi Kundi H.

Uswisi, ambayo kitendo cha kuingizwa kwenye chungu cha kwanza kiliibua mjadala, wamepangwa na Ufaransa, Ecuador na Honduras.

Brazil itaanza kwa kucheza na Croatia katika Uwanja wa Arena Corinthians Juni 12, 2014 wakati Cameroon itakuwa uwanjani siku inayofuata dhidi ya Mexico katika Uwanja wa Arenas das Dunas.

Juni 13 kutakuwa pia na mechi ya Hispania dhidi ya Uholanzi na Chile dhidi ya Australia.

Mechi za makundi zitamalizika Juni 26, kupisha hatua ya 16 bora.chanzo MWANASPOTI.


TUNAOMBA BOFYAHAPA LIKE PAGE YETU KWA HABARI NYINGI NA ZA KUSISIMUAAA(USIPITWEEE)