chadema yawasilisha majibu na pingamizi la awali dhidi ya kesi yake na zitto kabwe

CHAMA cha Demokrasia na Maendeleo (Chadema),  kimewasilisha majibu na pingamizi la awali dhidi ya Mbunge wa Kigoma Kaskazini, Zitto Kabwe kuhusu Kamati Kuu ya Chama hicho akiitaka mahakama kuzuia uanachama wake usijadiliwe hadi kesi ya msingi itakaposikilizwa.

Mbali na majibu hayo na pingamizi la awali, pia chama hicho kimejibu barua ya Zitto  pamoja na kuwasilisha mwenendo wa shauri lililopelekea kuvuliwa nyadhifa za uongozi katika chama hicho kama mlalamikaji alivyoomba.

Majibu hayo yaliwasilishwa katika Mahakama Kuu Tanzania, Kanda ya Dar es Salaam, kupitia mawakili  wa chama hicho, Tundu Lissu na Peter Kibatala ambao wamewasilisha pingamizi  la awali na kutoa hoja sita wakiitaka mahakama kutupilia mbali kesi hiyo  kwa kudai haina mashiko ya kisheria.

Katika hoja ya kwanza, Chadema kimedai kwamba shauri hilo halina msingi kwa sababu halikuwasilishwa katika mahakama ya chini kusikilizwa na kutolewa maamuzi kwa kujibu wa kifungu cha 13 cha Mwenendo wa Mashauri ya Madai.

Hoja yake ya  pili, ni kuwa shauri hilo halina msingi na limewasilishwa masijala kuu ya Mahakama Kuu badala ya masijala ya Wilaya kinyume cha sheria na taratibu za masijala za mahakama.

Katika hoja ya tatu, mlalamikaji hajaomba maoni ya Mahakama Kuu kuhusiana na suala linalohusiana na uanchama wake Chadema.

Hati hiyo inaeleza katika hoja  ya nne kwamba shauri hilo halina msingi kwa sababu Zitto anaendesha mashauri mawili kwa wakati mmoja, Mahakama Kuu na rufaa ya kwenye Baraza Kuu la chama.

Katika hoja ya tano, inaleza kwamba shauri hilo Mahakama Kuu siyo mahali pake kwa sababu Zitto hajatumia nafasi zilizopo ndani ya Chadema.

Hoja ya sita, Mahakama Kuu haina mamlaka ya kutoa maamuzi ya maombi ya kuzuia Zitto asijadiliwe uanachama wake kwa sababu ni mambo ya yanayohusu Chadema.