Mtoto wa Rambo afariki dunia

HOLLYWOOD, Marekani SAGE Moonblood Stallone (36) mtoto wa kiume msanii wa filamu za kibabe, Sylvester Stallone 'Rambo', aliyecheza sambamba na baba yake filamu ya "Rocky V," amekutwa amekufa nyumbani kwake, Hollywood, nchini Marekani juzi Ijumaa. Gazeti la New York Post lilithibitisha kifo cha mtoto huyo.  Taarifa za ndani zinadai kuwa, huenda kifo chake kimesababishwa na matumizi kupita kiasi ya dawa na hakuna uwezekano wa hujuma za kumuua. Sage Stallone alikuwa mtoto wa kwanza wa Sylvester Stallone katika ndoa yake ya kwanza na Sasha Czack kabla ya kutengana mwaka 1985. Sage ana wadogo zake wengine, Seargeoh na wasichana wengine wa watatu wa kufikia, Sophia, Sistine na Scarlet. Sage alicheza filamu kwa mara ya kwanza kama Robert Balboa katika filamu ya Rocky V mwaka 1990 alipokuwa na miaka 14.  Pia Sage alionekana kwenye filamu na baba "Daylight," lakini mwaka mmoja baadaye aliachana na tasnia ya uigizaji. Sylvester Stallone hajasema lolote mpaka sasa, na juzi alionekana katika tamasha la Comic-Con mjini San Diego akitangaza filamu yake mpya ya "The Expendables 2."  Katika filamu hiyo, Stallone ameungana na Arnold Schwarzenegger, ambaye ni filamu yake ya kwanza tangu amalize muda wake uongozi kama gavana wa jimbo la California.