MTUHUMIWA ANAYEWALEWESHA WANAWAKE NA KUWAIBIA ANASWA

 Na Issa Mnally

JESHI la Polisi Kituo cha Pangani, Ilala Dar es Salaam limemnasa kijana mmoja aliyejulikana kwa jina moja la Abdallah kwa tuhuma za kuwawekea wanawake madawa ya kulevya katika vinywaji kisha kuwaibia, Amani linakujuza.

Ishu hiyo ilijiri Jumatatu iliyopita katika baa moja iliyopo Amana, Ilala jijini Dar es Salaam ambapo baada ya kunaswa, mlalamikiwa huyo  alipelekwa katika kituo hicho cha polisi kwa hatua zaidi.

Kwa mujibu wa chanzo chetu, mtuhumiwa alitiwa mbaroni baada ya kuwekewa mtego uliomnasa.

“Polisi walikuwa wakimsaka kwa muda mrefu  kutokana na madai ya kuwatilia ‘unga’ watu, hasa wanawake kwenye vinywaji kisha kuwaibia.

“Nasikia ameshawaliza wanawake wengi wakiwemo vigogo,” kilisema chanzo hicho.

Siku ya tukio, Abdallah alikuwa kwenye baa hiyo bila kujua kuwa polisi walikuwa wakimuwinda, ndipo walimpomzingira na kumnasa. 

Inaelezwa kuwa baada ya habari hii kutoka, wanawake wengi watamiminika kituoni hapo kutoa malalamiko yao juu yake.

Mwandishi wa Amani aliingia Kituo cha Polisi Pangani na kumuuliza afande mmoja kuhusu sakata la kijana huyo, alikiri lakini akasema yeye si msemaji wa polisi.