HATIMAYE TIMU YA MOROGORO IMETWAA UBINGWA WA COPA COCA COLA!

Moro wakishangilia ubingwa wao pamoja na mfano wa hundi waliyokabidhiwa

MOROGORO imetwaa ubingwa wa mashindano ya vijana chini ya umri wa miaka 17, Copa Coca Cola baada ya kuifunga Mwanza bao 1-0, kwenye Uwanja wa Karume, Dar es Salaam.

Shukrani kwake, Salum Ramadhani aliyefunga bao hilo, pekee dakika ya 36, akiunganisha pasi nzuri ya Mtalemwa Katunzi.

Mapema katika mchezo wa kusaka mshindi wa tatu, Temeke ilijinyakulia Medali ya Shaba ya michuano hiyo, baada ya kuwafunga Tanga mabao 2-0, yote yakitiwa kimiani na

Rehani Kibingu katika dakika za 48 na 86.

Kwa kutwaa ubingwa, Morogoro wamezawadiwa Sh Milioni 8 na wadhamini wa michuano hiyo, Coca Cola, wakati Mwanza wamepata Sh. Milioni 4.4 na washindi wa tatu, Temeke wamepata Milioni 3.2.

Katika tuzo binafsi, Kocha wa Tanga, Mohamed Kampira aliibuka kocha bora, mwamuzi bora alikuwa Liston Hiyari wakati kipa bora alikuwa Shukuru Mohamed wa Temeke, mfungaji bora Mtelamwa Katunzi wa Morogoro, mchezaji bora ni Shiza Kichuya, ambapo kila mmoja alipata sh 750,000 huku Tanga ikiondoka na Sh Milioni 1 kwa kuwa timu yenye nidhamu.

Mwanza ilipata tiketi ya kucheza fainali baada ya kuifunga Temeke mabao 3-1 wakati Morogoro iliiondoa Tanga kwenye nusu fainali kwa ushindi wa mabao 3-1. Mechi zote za nusu fainali zilichezwa Uwanja wa Kumbukumbu ya Karume juzi.

Mashindano ya Copa Coca-Cola 2012 yalianza Juni 24 mwaka huu yakishirikisha mikoa 28 ya Tanzania Bara na Zanzibar.

PICHA KWA NIABA YA BINZUBEIR        http://bongostaz.blogspot.com