POLISI IRINGA WAMFICHA MTUHUMIWA MAUWAJI YA MWANGOSI

Mtuhumiwa alijifunika kwa kofia akiwa chini ya ulinzi mkali wa Polisi

Na Gustav Chahe, Iringa

JESHI la polisi mkoani Iringa wamebuni njia mpya  ya kumfikisha mahakamani mtuhumiwa wa mauaji ya aliyekuwa mwandishi wa habari wa kituo cha runinga cha Channel Ten Daud Mwangosi kwa kuwatumia askari kanzu kama watuhumiwa ili wamfiche mwenzao.

Pasificus Cleophace Simon mtuhumiwa wa mauaji hayo mwenye namba G 2573 alifikishwa mahakamani hapo jana katika ulinzi wa polisi huku waandishi wa habari wakizuiliwa kupiga picha na kuzuiliwa kuingia katika chumba cha mahakama ambako kesi ilikuwa ikiendeshwa.

Akifikishwa mahakamani hapo, mtuhumiwa huyo alikuwa katika gari la mahabusu (karandinga) kama

watuhumiwa wengine tofauti na siku za mwanzo alipokuwa akifikishwa mahakamani hapo kwa gari la kifahari.

Mara baada ya kuahirishwa kwa kesi hiyo mwendesha mashtaka wa serikali Blandina Manyanda aliwaambia waandishi wa habari kuwa mbele ya  Hakimu Mkazi wa Mkoa Gradness Nance Bath kesi hiyo imeahirishwa hadi Machi 14 Mwaka huu igtakapotajwa tena huku akieleza kuwa upelelezi haujakamilika na mtuhumiwa amerudishwa mahabusu.