Profesa Lipumba kugombea tena urais 2015

Makamu wa kwanza wa rais wa Serikali ya Umoja wa kitaifa ya Zanzibar, Seif Shariff Hamad, amemtangaza Mwenyekiti wa chama hicho, Profesa Ibrahim Lipumba kuwa mgombea wa kiti cha Urais wa Jamhuri ya Muungano wa Tanzania katika uchaguzi mkuu ujao.

Aidha CUF imewatangazia neema Watanzania kuwa endapo itachukua madaraka katika uchaguzi huo itawajaza fedha mifukoni ikiwa ni njia mojawapo ya kuwaondolea umasikini.

Makamu huyo wa kwanza wa rais alisema hayo katika mkutano wa uzinduzi wa oparesheni ya mkachamchaka kuelekea mwaka 2015 (V4C), uliofanyika katika viwanja vya shule ya msingi Kiwanja cha Ndege, manispaa ya Morogoro.

Alisema Profesa Lipumba bado ni kiongozi shupavu anayestahili kugombea wadhifa huo kupitia CUF katika uchaguzi ujao kwakuwa anakubalika ndani ya chama hicho pamoja na kwa wananchi.

Alisema kuwa operesheni za V4C zilizoanza Mei mwaka jana zitaendelea nchi nzima kwa viongozi wakiongozwa na mwenyekiti wa chama hicho na wafuasi wake kupita kila kata na wilaya mbalimbali wakihamasisha wananchi kukiunga mkono chama hicho.