MAJAMBAZI YAUA POLISI HOTELINI

ASKARI Polisi, Mohamed Mjomba (44) amepoteza maisha baada ya kushambuliwa na majambazi, waliovamia Hoteli ya Kitalii ya Pongwe Uroa Wilaya ya Kati Unguja.

Kamanda wa Polisi Mkoa wa Kusini Unguja, Augostino Olommi alithibitisha kuuawa kwa askari huyo. Aliongeza kuwa majambazi hao walivamia hoteli hiyo saa nane za usiku kwa lengo la kufanya uporaji.

Olommi alisema majambazi hao waliwateka na kuwaweka chini ya ulinzi walinzi wa kawaida waliokuwepo hotelini hapo, lakini walipambana na upinzani kutoka kwa askari Polisi, waliokuwa wakilinda hoteli hiyo kwa kurushiana risasi, ambapo askari wawili walijeruhiwa.

Askari aliyejeruhiwa kwa kupigwa risasi ya bega ni Ibrahim Juma (33), ambaye amelazwa katika Hospitali ya Mnazi Mmoja huku Mjomba akipoteza maisha baada ya kujeruhiwa vibaya na majambazi hao, ambao hata hivyo walikimbia.

“Jeshi la Polisi linaendelea na uchunguzi wa tukio hilo ili kuwakamata wahusika wote na kuwafikisha katika vyombo vya sheria,” alisema.

Olommi aliwataka wamiliki wa hoteli na wafanyakazi, kutoa taarifa wakati wanapotilia wasiwasi nyendo za watu wasiofahamika katika maeneo ya hoteli za kitalii. Mjomba alizikwa jana kwa heshima zote za Jeshi la Polisi kijijini kwao Bambi Wilaya ya Kati Unguja.

CHANZO:HABARILEO